Lunglei West bialtu MLA T. Lalhlimpuia chuan zirna, hna thawhna leh thil tihna kawng hrang hranga inkiltawih lutuk chu mahni nih tur nih phak lohna a nih thu sawiin, hnam dang lakah leh khawvel huapa lang turin boruak ngam taka chet ve bawrh bawrh a ṭul thu a sawi.

"Sawrkar hna lak hrang hrang dil kawngah te, inelna leh intihsiakna hrang hranga tel kawngah te huaisen taka inpho chhuah ngam a pawimawh," tiin, zirlaite'n mahni inring tawk taka khawvel an hmachhawn theih nan zirtirtute chu an zirlaite chher turin a chah.

Lunglei District-a sikul leh zirlaite chu State level leh National level thlenga inpho chhuak thei turin zirna, infiamna leh zirna kaihhnawih thil hrang hrangah theih tawp chhuah tur leh hmasawn zel tum turin a chah bawk.

Lunglei District Secondary School Sports 2025-ah hian high school 39 an tel a. C. Ṭhuamluaia Mualah hian football inelna buatsaih nghal niin, Lena Stadium-ah athletics, Mizo infiamna kalchhet leh inhrui pawh bakah, football match ṭhenkhat kalpui a ni dawn a. LDSC Basketball Court-ah inkawibah, LDSC Volleyball Court-ah volleyball leh SAI Extension Centre Hall-ah taekwondo inelna te kalpui a ni bawk ang.